لاس اینجلس ایئر پورٹ سے اڑان بھرنے والے 2 مسافر طیارے فضا میں ٹکرانے سے بال بال بچ گئے، واقعے میں کسی کے زخمی ہونے کی اطلاع نہیں ملی۔
غیر ملکی میڈیا رپورٹس کے مطابق امریکی ریاست کیلیفورنیا کے لاس اینجلس انٹرنیشنل ایئر پورٹ (ایل اے ایکس) سے اڑان بھرنے کے بعد 2 مسافر طیارے فضا میں ایک دوسرے کے انتہائی قریب آ گئے، تاہم ممکنہ تصادم سے بچنے میں کامیاب رہے۔
رپورٹ کے مطابق یہ واقعہ ہفتہ 7 نومبر کو مقامی وقت کے مطابق رات 12 بج کر 20 منٹ پر پیش آیا، ان میں ایئر فرانس اور امریکن ایئر لائنز کے طیارے شامل تھے۔
امریکی وفاقی ادارے فیڈرل ایوی ایشن ایڈمنسٹریشن (ایف اے اے) نے بیان میں بتایا ہے کہ ایئر فرانس کی پرواز AF28 نے ایئر پورٹ سے روانگی کے بعد بغیر اجازت اپنا رخ تبدیل کیا اور متوازی رن وے سے اڑان بھرنے والے ایک دوسرے طیارے کی پرواز کے راستے میں داخل ہو گئی۔
ایف اے اے کے مطابق ایئر ٹریفک کنٹرول نے فوری طور پر ایئر فرانس کے طیارے کے عملے کو پرواز کا راستہ درست کرنے کی ہدایات جاری کیں۔
ایئر ٹریفک کنٹرول کی آڈیو ریکارڈنگ میں ایک کنٹرولر کو فوری طور پر ایئر فرانس کے عملے کو ہدایت دیتے ہوئے سنا جا سکتا ہے۔
بعد ازاں ایئر فرانس کے پائلٹ سے دوبارہ پوچھا گیا کہ انہوں نے مقررہ پرواز کے راستے سے انحراف کیوں کیا تھا؟
جب پائلٹ سے پوچھا گیا کہ وہ کس طریقہ کار کے تحت پرواز کر رہے تھے تو آڈیو میں ایک پائلٹ کو یہ کہتے سنا گیا کہ آپ مجھے 1 منٹ دیں، اس پر کنٹرولر نے جواب دیا کہ کوئی مسئلہ نہیں۔
اس کے بعد دوسرے پائلٹ نے بتایا کہ ہمیں SUMMR TWO ڈیپارچر روٹ پر پرواز کرنے کی ہدایت کی گئی تھی۔
پہلے پائلٹ نے بھی تصدیق کی کہ وہ بھی SUMMR TWO روٹ کے مطابق ہی پرواز کر رہے تھے۔
ایئر فرانس کے ایک ترجمان نے تصدیق کی کہ 7 نومبر 2026ء کو لاس اینجلس سے پاپیٹے جانے والی پرواز AF028 کے عملے کو اڑان بھرنے کے کچھ ہی دیر بعد ایئر ٹریفک کنٹرول کی جانب سے پرواز کا راستہ تبدیل کرنے کی ہدایت موصول ہوئی تھی۔
بیان میں کہا گیا ہے کہ عملے نے فوری طور پر ہدایات پر عمل کیا اور اس کے بعد پرواز جاری رکھی، طیارہ مقامی وقت کے مطابق صبح 5 بج کر 59 منٹ پر پاپیٹے میں معمول کے مطابق باحفاظت اتر گیا۔
