تحریکِ تحفظِ آئین کے رہنماؤں محمود خان اچکزئی، علامہ ناصر عباس اور اسد قیصر نے مولانا فضل الرحمٰن اور ان کے خاندان کے خلاف کردارکشی کی مہم کی شدید مذمت کرتے ہوئے اسے فوری طور پر بند کرنے کا مطالبہ کیا ہے۔
مشترکہ بیان میں رہنماؤں نے گورنر راج اور ایمرجنسی کے خلاف مولانا فضل الرحمٰن کے دوٹوک اور اصولی مؤقف کو سراہتے ہوئے کہا کہ سیاسی اختلاف کسی بھی جمہوری معاشرے کا حسن ہے، اختلافِ رائے کی آڑ میں کسی کو نشانہ بنانا مذہبی، اخلاقی اور معاشرتی روایات کے منافی ہے۔
ان کا کہنا ہے کہ کردارکشی اور بہتان تراشی کی مہم سیاست کو نفرت، انتشار اور تقسیم کی گہری کھائی میں دھکیلنے کے مترادف ہے، اختلاف کا جواب دلیل اور منطق سے دیا جانا چاہیے، نہ کہ کردارکشی اور الزامات کے ذریعے۔
رہنماؤں نے مطالبہ کیا ہے کہ اس مہم کو فوری طور پر بند کیا جائے اور اس میں ملوث عناصر اپنا طرزِ عمل درست کریں۔
مشترکہ بیان میں کہا گیا ہے کہ گورنر راج اور ایمرجنسی صوبائی خود مختاری، عوامی مینڈیٹ اور پارلیمانی جمہوریت کی روح کے منافی ہے، مولانا فضل الرحمٰن نے اس حوالے سے جو سوالات اٹھائے ہیں، ان کا جواب دلیل، آئین اور قانون کی روشنی میں دیا جانا چاہیے۔
