پاکستان بھارت میں ہونے والے شنگھائی تعاون تنظیم ثقافتی فورم (ایس سی او) تہذیبی مکالمے میں شرکت کرے گا۔
ترجمان دفتر خارجہ کے مطابق پاکستان نے مصدق ملک کو ایس سی او تہذیبی مکالمے میں نمائندگی کے لیے نامزد کیا ہے، وہ 20 سے 22 نومبر تک نئی دلی میں ہونے والے ایس سی او تہذیبی مکالمے میں شرکت کریں گے۔
رکن ممالک کے نمائندے تہذیبی مکالمے اور ثقافتی ہم آہنگی کے امور پر تبادلہ خیال کریں گے۔
ترجمان دفتر خارجہ کا کہنا ہے کہ پاکستان تہذیبوں کے درمیان مکالمے اور عوامی روابط کے فروغ کے لیے پُرعزم اور باہمی احترام کے جذبے کے تحت ایس سی او کے پلیٹ فارم پر عوامی روابط کے فروغ کا حامی ہے۔
دونوں پڑوسی ممالک کے درمیان دوطرفہ تعلقات میں بہتری کے آثار نہیں ہیں، تاہم دونوں ملکوں نے شنگھائی تعاون تنظیم کے کثیرالجہتی اجلاسوں میں شرکت کو دوطرفہ تنازعات سے الگ رکھنے کی پالیسی اختیار کر رکھی ہے۔
بھارت نے 25 ممالک کو دعوت نامے بھیجے ہیں، جن میں شنگھائی تعاون تنظیم کے تمام 10رکن ممالک (بیلا روس، چین، بھارت، ایران، قازقستان، کرغزستان، پاکستان، روس، تاجکستان اور ازبکستان) کے علاوہ تنظیم کے مبصر اور مکالماتی شراکت دار ممالک بھی شامل ہیں۔
