پاکستان کرکٹ ٹیم کے سابق کپتان شاہد آفریدی نے اپنی سب سے چھوٹی بیٹی ارویٰ کے ساتھ 3 روزہ تفریحی دورے پر دبئی گئے ہیں۔
شاہد آفریدی نے فوٹو اینڈ ویڈیو شیئرنگ ایپ انسٹاگرام پر اس خصوصی دورے کی کچھ خوبصورت تصاویر شیئر کی ہیں۔
انہوں نے تصاویر کے کیپشن میں لکھا ہے کہ دبئی میں گزرے 3 خوبصورت دن صرف ارویٰ کے نام تھے، یہ مختصر سفر میری بیٹی کی پسندیدہ سرگرمیوں، بے شمار مسکراہٹوں، محبت اور قہقہوں سے بھرپور رہا۔
سابق کپتان کی جانب سے شیئر کی گئی تصاویر میں ارویٰ کو اپنے والد کے ہمراہ خوشگوار موڈ میں دبئی کے خوبصورت مناظر سے لطف اندوز ہوتے دیکھا جا سکتا ہے۔
واضح رہے کہ شاہد آفریدی اس سے قبل بھی اپنی بیٹیوں بالخصوص چھوٹی بیٹی ارویٰ کے لیے سوشل میڈیا پر محبت بھرے پیغامات شیئر کرتے رہے ہیں۔
رواں سال فروری میں بھی انہوں نے ارویٰ کی چھٹی سالگرہ کے موقع پر جذباتی پیغام شیئر کیا تھا۔
یاد رہے کہ سابق کپتان اور ان کی اہلیہ نادیہ شاہد کی 5 بیٹیاں ہیں، جن کے نام اقصیٰ، انشا، عجوہ، اسمارہ اور ارویٰ ہیں۔
