قومی اسمبلی کے حلقہ این اے 77 گوجرانوالہ اور پنجاب اسمبلی کے حلقہ پی پی 203 چیچہ وطنی پر ضمنی انتخابات کے لیے پولنگ جاری ہے۔
این اے 77 کی نشست ن لیگی ایم این اے محمود بشیر ورک کے انتقال پر خالی ہوئی تھی جبکہ پی پی 203 چیچہ وطنی کی نشست ن لیگ کے حنیف جٹ کے انتقال کے باعث خالی ہوئی تھی۔
این اے 77 کے ضمنی انتخاب کے لیے مجموعی طور پر 11 امیدوار حصہ لے رہے ہیں جن میں مسلم لیگ ن کے امیدوار راشد بشیر ورک، مرکزی مسلم لیگ کے امیدوار قاضی ابراہیم گجر اور آزاد میدوار الفت رسول وڑائچ نمایاں ہیں۔
اس حلقے میں پیپلز پارٹی نے اپنا امیدوار کھڑا نہیں کیا جبکہ پی ٹی آئی نے بائیکاٹ کر رکھا ہے۔
دوسری جانب چیچہ وطنی کے حلقہ پی پی 203 میں آج ہونے والے ضمنی الیکشن کے لیے 7 امیدوار میدان میں ہیں، یہاں بھی تحریک انصاف نے انتخابات کا بائیکاٹ کر رکھا ہے۔
