وفاقی وزیر اقتصادی امور احد چیمہ نے کہا ہے کہ اسمارٹ میٹرز کی تنصیب سے بجلی چوری اور اووربلنگ کی روک تھام میں مدد ملے گی۔
اعلامیہ وزارت اقتصادی امور کے مطابق وفاقی وزیر اقتصادی امور احد چیمہ کی زیر صدارت ڈسکوز سے متعلق اجلاس ہوا جس میں وزیر پاور ڈویژن اویس لغاری، مشیر برائے نجکاری اور متعلقہ وزارتوں کے سینئر حکام نے شرکت کی۔
اجلاس میں بجلی کی تقسیم کار کمپنیوں کے ترقیاتی پروگراموں کا جائزہ لیا گیا۔ تمام ڈسکوز کے ٹرانسفارمرز پر اسمارٹ میٹرز نصب کرنے کےلیے فنڈز کے انتظام پر غور کیا گیا۔ اسمارٹ میٹرنگ نظام کےلیے فنڈز کے انتظام میں مثبت پیشرفت ہوئی ہے۔
اس موقع پر وزیر اقتصادی امور احد چیمہ نے کہا کہ اسمارٹ میٹرز کی تنصیب سے بجلی چوری اور اووربلنگ کی روک تھام میں مدد ملے گی۔
انہوں نے بتایا کہ ڈسکوز کی نجکاری کے بعد بھی اسمارٹ میٹرنگ منصوبہ جاری رکھنے کےلیے انتظامات کیے جائیں گے۔
وفاقی وزیر کا کہنا تھا کہ حکومت ایسے فریم ورک بنائے گی جس کے تحت نجی سرمایہ کار اسمارٹ میٹرنگ منصوبے کو آگے بڑھائیں۔ اسمارٹ میٹرنگ منصوبے میں صارفین، سرمایہ کاروں اور حکومت کے مفادات کا تحفظ یقینی بنایا جائے گا۔
احد چیمہ نے کہا کہ ترقیاتی پروگراموں کےلیے کثیرالجہتی شراکت داروں سے مذاکرات نجکاری مکمل ہونے تک جاری رہیں گے۔ کسی ڈسکو کی نجکاری کے وقت ترقیاتی پروگرام طے شدہ انتظامات کے تحت نجی سرمایہ کار کو منتقل ہوں گے۔
ان کا یہ بھی کہنا تھا کہ نجکاری کے بعد بھی ڈسکوز کو نیپرا قوانین کے مطابق چلنا ہوگا۔ نجکاری کا مقصد اخراجات یا غیر ضروری دباؤ صارفین پر منتقل کرنا نہیں ہے۔ حکومت نجکاری کے عمل میں صارفین کے مفادات کا تحفظ یقینی بنائے گی۔
