سابق وفاقی وزیر مواصلات اسعد محمود نے قومی احتساب بیورو (نیب) میں پاکستان پوسٹ میں غیر قانونی بھرتیوں کے کیس میں جواب جمع کرا دیا ہے۔
جواب میں کہا گیا کہ نیب ترامیم کے بعد کسی سرکاری کام، منصوبے یا اسکیم کے طریقہ کار کی خامیوں پر نیب قانون کا اطلاق نہیں ہوتا۔
جواب میں مزید کہا گیا کہ اسعد محمود پر نیب آرڈیننس کی شق 4 اور 9 کا اطلاق نہیں ہوتا۔
نیب نے استفسار کیا تھا کہ پاکستان پوسٹ میں 2646 اسامیوں پر 4252 بھرتیاں کیسے کی گئیں؟
سابق وفاقی وزیر نے جواب میں کہا کہ بطور وزیر مواصلات کسی تقرری کا حکم نہیں دیا تھا، بھرتیاں پوسٹ آفس کے مینوئل، محکمانہ قواعد کے مطابق مجاز افسران، محکمانہ کمیٹیوں نے کیں۔
نیب نے سوال کیا کہ اسعد محمود نے مالی فائدہ حاصل کیا اور اپنے رشتہ داروں کو نوکریاں کیسےدیں؟
اس پر جواب دیا گیا کہ رشتہ داروں کو نوکریاں دینے کی تردید کرتا ہوں، مالی فائدہ دینے کا کوئی الزام یا ثبوت نہیں، پاکستان پوسٹ میں بھرتیاں اسٹیبلشمنٹ ڈویژن کی منظوری سےہوئی تھیں۔
