آسٹریلیا میں سینڈ پیپر بال ٹیمپرنگ کا تنازع بڑھنے لگا جس کے بعد آسٹریلوی کپتان پیٹ کمنز نے مختلف ایشوز پر بات کرنے کے لیے میڈیا کو بلا لیا۔
اس حوالے سے پیٹ کمنز کا کہنا ہے کہ کل شیفلڈ شیلڈ کے میچ کے لیے میں ٹریننگ کر رہا ہوں، صبح سب سے بات کرنے کو تیار ہوں، ایک ہفتے میں جو ہوا، عثمان خواجہ کے الزمات سامنے آئے ان پر تفصیلی بات کرنا چاہتا ہوں۔
انہوں نے کہا کہ کرکٹ آسٹریلیا سے کہوں گا کہ وہ اس پر تفصیلات جاری کریں۔
کپتان پیٹ کمنز کے سوشل میڈیا پیغام کے بعد کرکٹ آسٹریلیا نے بھی اعلامیہ جاری کر دیا۔
کرکٹ آسٹریلیا کا کہنا ہے کہ پیٹ کمنز کرکٹ سینٹرل میں کل ٹریننگ کریں گے، وہ میڈیا کے لیے دستیاب ہوں گے۔
واضح رہے کہ سابق آسٹریلوی کرکٹر عثمان خواجہ کے انکشافات نے بال ٹیمپرنگ اسکینڈل سینڈ پیپر گیٹ 2018ء کو پھر زندہ کر دیا ہے۔
عثمان خواجہ نے 2018ء کے سینڈ پیپر اسکینڈل سے متعلق اہم انکشافات اپنی آٹو بائیو گرافی ’صبر‘ میں کیے ہیں۔
انہوں نے دعویٰ کیا تھا کہ آسٹریلوی ٹیم کے تمام کھلاڑی بال ٹیمپرنگ کے منصوبے سے آگاہ تھے، میں یہ سب کرنا نہیں چاہتا، میں وہ ایک نہیں بننا چاہتا کہ کوئی آگے آئے اور سچائی بیان کرے۔
عثمان خواجہ کا کہنا تھا کہ میں نے سوچا کہ 8 سال بعد سچائی باہر آنی چاہیے، میں نے کہا تھا کہ ہمیں اسے بحیثیت ٹیم لینا چاہیے، ہم نے یہ ٹیم کی حیثیت سے کیا تھا۔
