سابق بھارتی کرکٹر سنیل گواسکر نے ویرات کوہلی کی 100 سنچریوں کے ہدف پر دلچسپ تبصرہ کیا ہے۔
سنیل گواسکر نے اپنے حالیہ کالم میں ویرات کوہلی کی 100 سنچریوں کے ہدف پر تبصرہ کرتے ہوئے لکھا کہ اگر کوئی ساتھی کھلاڑی اس تاریخی سنگ میل تک پہنچنے میں اپنے رنز کی قربانی دے کر ویرات کوہلی کی مدد کرتا ہے تو یہ صرف ویرات کوہلی ہی نہیں بلکہ تمام بھارتی کرکٹ شائقین کے لیے خوشی کا لمحہ ہو گا۔
اُنہوں نے لکھا کہ بھارتی شائقین ہمیشہ ریکارڈز کو خاص اہمیت دیتے ہیں اور کوئی بھی بھارتی مداح ایسا نہیں ہو گا جو ویرات کوہلی کو 100 بین الاقوامی سنچریاں مکمل کرتے ہوئے نہ دیکھنا چاہتا ہو۔
سابق بھارتی کرکٹر نے واضح کیا کہ کرکٹ ایک ٹیم گیم ہے، اوّلین ترجیح ہمیشہ ٹیم کی جیت ہونی چاہیے، تاہم اگر کسی کھلاڑی کو ٹیم کی کامیابی متاثر کیے بغیر ذاتی سنگ میل حاصل کرنے کا موقع دیا جاسکتا ہے تو اس میں کوئی حرج نہیں۔
واضح رہے کہ ویرات کوہلی اب تک انٹرنیشنل کرکٹ میں 86 سنچریاں بنا چکے ہیں اور اب تک 100 سنچریاں بنانے کا عالمی ریکارڈ صرف سابق بھارتی لیجنڈ سچن ٹنڈولکر کے پاس ہے۔
ویرات کوہلی اب صرف ون ڈے کرکٹ کھیل رہے ہیں، اس لیے 100 سنچریوں کا سنگ میل حاصل کرنا ان کے لیے ایک بڑا چیلنج ہے۔
