مغربی افریقی ملک سینیگال کے ساحل کے قریب تارکینِ وطن کی کشتی ڈوبنے سے ہلاکتوں کی تعداد 39 ہو گئی۔
سینیگال کی سرکاری خبر ایجنسی کے مطابق حادثہ دارالحکومت ڈاکار سے تقریباً 180 کلومیٹر دور کیبیمیر کے قریب پیش آیا۔
وزارتِ داخلہ کے مطابق حادثہ اتوار کے روز پیش آیا جس میں اب تک صرف 1 شخص کو زندہ بچایا جا سکا ہے۔
کشتی میں غیر قانونی طور پر بیرونِ ملک جانے کے خواہش مند افراد سوار تھے تاہم حکام نے کشتی میں موجود افراد کی مجموعی تعداد نہیں بتائی۔
تارکینِ وطن کے حقوق کے لیے کام کرنے والی تنظیم واکنگ بارڈرز کے مطابق رواں سال کے پہلے 5 ماہ کے دوران مغربی افریقا سے اسپین کے کینری جزائر پہنچنے کی کوشش میں 635 افراد ہلاک ہو چکے ہیں۔
