لاس اینجلس ایئرپورٹ سے روانگی کے فوری بعد خوفناک حادثے سے بال بال بچنے والے ایئر فرانس کے طیارے کے پائلٹس کے خلاف امریکا اور فرانس میں باقاعدہ تحقیقات کا آغاز کردیا گیا اور پائلٹس کو ’پائلٹ ڈیوی ایشن‘ کا نوٹس جاری کیا گیا ہے۔
واقعے کے فوراً بعد ایئر ٹریفک کنٹرولر نے پائلٹس کو ریڈیو پر باقاعدہ وارننگ دی اور ان کی اس غلطی کو بطور خلاف ورزی رپورٹ کیا۔ کنٹرولر نے پائلٹس کو ایک مخصوص ٹیلی فون نمبر فراہم کیا جس پر پائلٹس کو لینڈنگ کے بعد رابطہ کرکے اپنی پوزیشن واضح کرنے کا حکم دیا۔
امریکی ہوابازی کے نگراں ادارے نے اس واقعے کی باضابطہ تحقیقات اپنے ہاتھ میں لے لی ہیں۔ پائلٹس کے خلاف حتمی کارروائی کا فیصلہ ان دو پہلوؤں پر کیا جائے گا۔
اگر پائلٹس کی جانب سے یہ اقدام کسی غلط فہمی یا آٹو میٹڈ سسٹم میں نیویگیشن کمانڈز غلط درج کرنے کی وجہ سے ہوا تو عام طور پر سزا کے بجائے اصلاحی اقدامات اور پائلٹس کی اضافی اصلاحی تربیت کی جائے گی۔
اگر ہائی لیول انسپکٹرز نے یہ نتیجہ اخذ کیا کہ پائلٹس نے جان بوجھ کر حفاظتی قوانین کو نظر انداز کیا تو پائلٹس کے خلاف سخت ڈسپلنری کارروائی عمل میں لائی جائے گی جس میں فلائنگ لائسنس کی معطلی یا منسوخی اور عدالتی کارروائی بھی شامل ہوسکتی ہے۔
واضع رہے کہ 7 نومبر 2026 کو فرانسیسی ایئرلائن کی پرواز کو لاس اینجلس سے ٹیک آف کے بعد ایئر ٹریفک کنٹرول کی ہدایات کے برعکس پائلٹس نے بغیر اجازت اچانک بائیں جانب تیز موڑ دیا۔
اسی وقت متوازی رن وے سے امریکن ایئر لائنز کا طیارہ بھی اڑان بھر چکا تھا۔ ایک دوسرے کے انتہائی قریب تقریباً 400 فٹ کے عمودی فاصلے پر آ گئے تھے۔جس کی ویڈیو سوشل میڈیا پر وائرل ہوئی تھی۔
ایئر ٹریفک کنٹرولر کی فوری مداخلت کی وجہ سے دونوں طیاروں کو فضا میں ٹکرانے سے بچا لیا گیا۔
