کراچی کے علاقے بلدیہ ٹاؤن میں سپارکو روڈ پر پولیس نے مقابلے کے دوران کار سوار شہری کے قتل میں ملوث 2 ملزمان کو گرفتار کر لیا۔
پولیس کے مطابق بلدیہ ٹاؤن میں سپارکو روڈ پر پولیس اور ڈاکوؤں کے درمیان مقابلہ ہوا، جس میں 2 ڈاکوؤں کو زخمی حالت میں گرفتار کیا گیا۔
ملزمان سے غیر قانونی اسلحہ، موبائل فون اور موٹر سائیکل برآمد ہوئی۔
پولیس کا کہنا ہے کہ فائرنگ کے تبادلے میں 2 ملزمان کو زخمی حالت میں گرفتار کر لیا گیا ہے، جبکہ ان کا 1 ساتھی فرار ہو گیا۔
پولیس نے بتایا ہے کہ ملزمان کی شناخت یاسر عرف بابل عرف اونٹ اور غلام مصطفیٰ عرف مستو کے نام سے ہوئی ہے۔
پولیس کا کہنا ہے کہ ملزمان نے 2 نومبر کو سپارکو روڈ پر کار سوار سعد ظفر کو فائرنگ کر کے قتل کیا تھا، ملزمان نے دوران تفتیش شہری کے قتل کا اعتراف کیا ہے۔
پولیس کو بیان دیتے ہوئے ملزمان نے بتایا کہ انہوں نے واردات کے دوران اسلحہ دکھا کر کار روکنے کی کوشش کی تھی، کار سوار شہری کی فائرنگ پر جوابی فائرنگ کی جس کے نتیجے میں سعد ظفر موقع پر ہی جاں بحق ہو گیا تھا۔
ملزمان نے بتایا ہے کہ ان کا 6 رکنی گروہ ہے جو ڈکیتی و راہزنی کی متعدد وارداتوں میں ملوث ہے، گرفتار ملزم غلام مصطفیٰ کے خلاف 8 جبکہ یاسر بابل کے خلاف 2 مقدمات درج ہیں۔
پولیس نے گرفتار ملزمان سے تفتیش کا آغاز کر کے گروہ کے باقی ملزمان کی تلاش شروع کر دی ہے۔
کراچی: مختلف علاقوں سے مزید 4 ڈاکو گرفتار
کراچی کے علاقے یعقوب آباد میں پولیس اور ڈاکوؤں کے درمیان فائرنگ کا تبادلہ ہوا، جس کے بعد 1 زخمی سمیت 2 ڈاکوؤں کو گرفتار کر لیا گیا۔
دوسری جانب سینئر سپرنٹنڈنٹ پولیس ضلع جنوبی کے مطابق کراچی کے علاقے کلفٹن باتھ آئی لینڈ میں کارروائی کے بعد گھر میں چوری میں ملوث 2 ملزمان کو گرفتار کیا گیا ہے، گرفتار ملزمان میں گھر کا ڈرائیور بھی شامل ہے۔
پولیس کا کہنا ہے کہ ملزمان سے 10 تولہ سونے کے 6 بسکٹ اور 5 لاکھ روپے نقد برآمد ہوئے ہیں۔
ایس ایس پی کراچی ساؤتھ نے بتایا ہے کہ چوری کا مقدمہ 6 نومبر کو تھانہ بوٹ بیسن میں درج کیا گیا تھا، جبکہ ملزمان نے سونے کے 10 بسکٹ، زیورات اور 50 لاکھ روپے نقد چوری کیے تھے۔
