امریکی وسط مدتی انتخابات میں کامیابی کے بعد ڈیموکریٹس نے جنوری میں کانگریس کا کنٹرول سنبھالتے ہی ایلون مسک اور وائٹ ہاؤس کے نئے چیف آف اسٹاف اسٹیفن ملر کے خلاف تحقیقات شروع کرنے کا عندیہ دیا ہے۔
امریکی رکن کانگریس رابرٹ گارسیا کے مطابق تحقیقات میں ایلون مسک کے سرکاری اداروں کی تنظیم نو کے دوران وفاقی ملازمین کی برطرفیوں میں کردار اور اسٹیفن ملر کی صدر ڈونلڈ ٹرمپ کی سخت گیر امیگریشن پالیسی پر عمل درآمد میں شمولیت کا جائزہ لیا جائے گا۔
رابرٹ گارسیا آئندہ سال ایوانِ نمائندگان کی طاقتور نگرانی کمیٹی کے سربراہ بننے کے امیدوار ہیں۔
دوسری جانب ڈیموکریٹس کے آئندہ اسپیکر ایوانِ نمائندگان حکیم جیفریز نے کہا ہے کہ میری جماعت وزیرِ دفاع پیٹ ہیگسیتھ کے مواخذے کی کارروائی کی حمایت کرے گی۔
اُدھر امریکی اٹارنی جنرل ٹوڈ بلانش نے ڈیموکریٹس کی جانب سے حکومتی عہدیداروں اور انتظامیہ کے اتحادیوں کو تحقیقات کا نشانہ بنانے کی دھمکیوں پر ردعمل دیتے ہوئے کہا ہے کہ حکومت ایسے اقدامات برداشت نہیں کرے گی۔
انہوں نے کہا کہ اگر نئی ڈیموکریٹ قیادت اس راستے پر چلنا چاہتی ہے تو ٹرمپ انتظامیہ مقابلے کے لیے تیار ہے۔
ٹوڈ بلانش کا کہنا ہے کہ موجودہ حکومت میں کام کرنے والے ہر فرد کو قانونی تحفظ فراہم کیا جائے گا اور میں خود اس ذمے داری کو نبھاؤں گا۔
