پاکستانی شوبز سے وابستہ معروف اداکار دانش تیمور اپنی اہلیہ، اداکارہ عائزہ خان کے ساتھ کام کب اور کن صورتوں میں کریں گے بتا دیا۔
2014ء میں شادی کے بندھن میں بندھنے والی پاکستانی شوبز کی مقبول جوڑی دانش تیمور اور عائزہ خان اپنی بہترین اداکاری کے باعث مداحوں میں خاصی مقبول ہے۔
دونوں نے اپنی صلاحیتوں کے بل بوتے پر پاکستانی ڈرامہ انڈسٹری کے صفِ اول کے اداکاروں میں جگہ بنائی ہے۔
حال ہی میں دانش تیمور اپنے ڈرامے ’نشتَر‘ میں اداکاری کے باعث مداحوں سے پذیرائی حاصل کر رہے ہیں، جبکہ عائزہ خان فواد خان کے ساتھ اپنی آنے والی فلم کی تیاریوں میں مصروف ہیں۔
حال ہی میں دانش تیمور امریکی ریاست نیو جرسی کے شہر نیو برنزوک میں منعقد ہونے والی فلاحی تقریب آور پیپل آور پاکستان میں شریک تھے۔
دانش تیمور نے اس موقع پر خصوصی مہمان کی حیثیت سے شرکت کی اور مداحوں سے ملاقات کے ساتھ فنڈ ریزنگ سرگرمیوں میں بھی حصہ لیا۔
تقریب کے دوران دانش تیمور سے سوال پوچھا گیا کہ کیا وہ مستقبل میں اپنی اہلیہ عائزہ خان کے ساتھ کسی ڈرامے میں دوبارہ کام کرنا چاہیں گے؟
اس پر اداکار نے جواب دیا کہ بالکل، کیوں نہیں؟ عائزہ کے ساتھ کام کرنے سے کون انکار کر سکتا ہے؟ ہم دونوں کو اداکاری سے محبت ہے اور ماضی میں بھی ایک ساتھ کام کر چکے ہیں۔
انہوں نے مزید کہا کہ دراصل ہم دونوں کسی مضبوط اور منفرد اسکرپٹ کے منتظر ہیں، اگر ہم دوبارہ ایک ساتھ کام کرتے ہیں تو وہ کوئی خاص پروجیکٹ ہونا چاہیے، جس میں دونوں کرداروں کو متوازن اور یکساں اہمیت دی گئی ہو۔
