وفاقی دارالحکومت اسلام آباد کو ملک کا پہلا مکمل کیش لیس شہر بنانے کا فیصلہ کر لیا گیا۔
وزیرِ مملکت برائے داخلہ طلال چوہدری کی زیرِصدارت کیش لیس اسلام آباد کے حوالے سے اجلاس ہوا۔
اجلاس میں چیئرمین سی ڈی اے، بینکنگ سیکٹر کے نمائندگان اور دیگر حکام نے شرکت کی۔
طلال چوہدری نے کہا کہ کیش لیس اسلام آباد منصوبے کی کامیابی کے لیے تمام اسٹیک ہولڈرز کی مشاورت اور تجاویز اہم ہیں، وزیرِاعظم اور وزیرِ داخلہ کی ہدایت پر کیش لیس اسلام آباد منصوبے پر تیزی سے عملدرآمد جاری ہے۔
اُنہوں نے بتایا کہ 30 نومبر کے بعد آئی سی ٹی اور سی ڈی اے کے کسی محکمے میں نقد ادائیگی نہیں کی جائے گی، 31 دسمبر تک اسلام آباد کے تمام مرچنٹس کو کیش لیس نظام میں شامل کرنے کا ہدف ہے۔
طلال چوہدری نے کہا کہ کیش لیس نظام سے مالیاتی شفافیت، ٹیکس مانیٹرنگ اور لین دین کے نظام میں بہتری آئے گی، اسلام آباد میں 26 ہزار مرچنٹس پہلے ہی ڈیجیٹل ادائیگیوں کے نظام سے منسلک ہیں۔
اُنہوں نے کہا کہ ریڑھی بانوں سے بڑے کاروباری مراکز تک ڈیجیٹل ادائیگیوں کی سہولت فراہم کی جائے گی، اسلام آباد کو جدید ڈیجیٹل شہر بنانے کے لیے تمام متعلقہ ادارے مل کر کام کریں گے۔
بینکنگ سیکٹر نمائندگان نے دورانِ اجلاس کیش لیس اسلام آباد منصوبے کی کامیابی کے لیے تعاون کی یقین دہانی کروائی ہے۔
