عالمی جامعات کی جانب سے کیے گئے سروے کے نتائج میں بتایا گیا ہے کہ سخت ویزا پالیسیز اور امیگریشن قوانین کے باعث بین الاقوامی طلبہ امریکا اور برطانیہ کے بجائے ایشیاء اور یورپ کی جامعات کو ترجیح دینے لگے ہیں۔
اسٹڈی پورٹلز، نیفزا اور آکسفورڈ ٹیسٹ آف انگلش کے 63 ممالک کی 437 جامعات پر مشتمل سروے کے مطابق گزشتہ سال کے مقابلے میں اگست سے اکتوبر کے دوران برطانیہ میں بین الاقوامی انڈرگریجویٹ طلبہ کی تعداد میں 19 فیصد جبکہ امریکا میں 13 فیصد کمی ریکارڈ کی گئی۔
کینیڈا اور آسٹریلیا میں بھی غیر ملکی طلبہ کی دلچسپی کم ہوئی ہے جبکہ ایشیاء اور برِاعظم یورپ کی جامعات میں بین الاقوامی داخلوں میں اضافہ دیکھا گیا۔
سروے کے مطابق امریکا کی ایک تہائی سے زائد جامعات نے آئندہ برسوں میں بھی غیر ملکی طلبہ کی تعداد مزید کم ہونے کا خدشہ ظاہر کیا ہے۔
رپورٹ میں کہا گیا ہے کہ ویزا پابندیاں، درخواستوں کی کارروائی میں تاخیر، سخت جانچ پڑتال اور تعلیم مکمل کرنے کے بعد ملازمت کے قوانین میں تبدیلیاں غیر ملکی طلبہ کی راہ میں بڑی رکاوٹ بن رہی ہیں جس کے باعث متعدد طلبہ اپنے تعلیمی منصوبے مؤخر یا منسوخ کر رہے ہیں۔
امریکی صدر ڈونلڈ ٹرمپ کی جانب سے غیر ملکی طلبہ کی سوشل میڈیا سرگرمیوں کی جانچ میں اضافہ، ہزاروں ویزوں کی منسوخی اور قیام کی مدت سے متعلق سخت قوانین کے بعد امریکی جامعات میں دلچسپی کم ہوئی ہے۔
دوسری جانب برطانیہ نے بھی امیگریشن کم کرنے کے لیے طلبہ کے ویزوں پر پابندیاں سخت کر دیں، بیشتر غیر ملکی طلبہ کے اہلِ خانہ کو ساتھ لانے پر پابندی عائد کی گئی ہے جبکہ تعلیم مکمل کرنے کے بعد ملازمت تلاش کرنے یا کام کرنے کے لیے قیام کی مدت کم کرنے کا منصوبہ بھی زیرِ غور ہے۔
نیفزا کی ایگزیکٹیو ڈائریکٹر ڈاکٹر فنتا آؤ کے مطابق سروے کے نتائج اس بات کی تصدیق کرتے ہیں کہ کسی ملک کی حکومتی پالیسیاں طلبہ کے بیرونِ ملک تعلیم، تحقیق اور ملازمت کے انتخاب پر گہرے اثرات مرتب کرتی ہیں۔
رائٹرز کے مطابق یہ سروے 3 نومبر کے وسط مدتی انتخابات سے پہلے کیا گیا تھا جن میں ڈیموکریٹس نے کانگریس کے دونوں ایوانوں کا کنٹرول حاصل کر لیا ہے تاہم ویزا پالیسیز سے متعلق انتظامی اختیارات بدستور صدر کے پاس ہیں۔
